আমদানিকৃত ‘ৰোব’ডগ’ক নিজস্ব উদ্ভাৱন বুলি প্ৰদৰ্শন! ইণ্ডিয়া AI সামিটত গালগোটিয়াছ বিশ্ববিদ্যালয়ৰ ষ্টল অপসাৰণ

নতুন দিল্লী, ১৮ ফেব্ৰুৱাৰীঃ
ইণ্ডিয়া AI ইমপেক্ট সামিট ২০২৬ত সংঘটিত এক বিতৰ্কই দেশজুৰি চাঞ্চল্য সৃষ্টি কৰিছে। চীনৰ পৰা আমদানিকৃত ৰোব’ডগক নিজস্ব উদ্ভাৱন হিচাপে প্ৰদৰ্শন কৰাৰ অভিযোগত Galgotias University-ৰ এক্সপ’ ষ্টল অপসাৰণ কৰা হয়।
চৰকাৰী সূত্ৰ অনুসাৰে, সামিটৰ এক্সপ’ত বিশ্ববিদ্যালয়খনৰ প্ৰতিনিধিসকলে ‘Unitree Go2’ নামৰ এটা ৰোব’ডগ প্ৰদৰ্শন কৰে, যিটো চীনৰ ৰ’বটিক্স কোম্পানী Unitree Robotics-এ নিৰ্মাণ কৰা। উক্ত ৰোব’ডগটোত কেমেৰা সংযুক্ত আছিল আৰু অনুষ্ঠানস্থলীত এইটো বিশ্ববিদ্যালয়খনৰ উদ্ভাৱনী প্ৰদৰ্শনৰ অংশ হিচাপে দৰ্শনাৰ্থীসকলক দেখুওৱা হৈছিল বুলি অভিযোগ উঠিছে।
ঘটনাটো সংঘটিত হয় নতুন দিল্লীৰ Bharat Mandapamত অনুষ্ঠিত সামিটত। এই সময়ছোৱাত ৰাষ্ট্ৰীয় সম্প্ৰচাৰক Doordarshan-এ ষ্টলটোৰ পৰা কিছু ভিডিঅ’ ক্লিপ সম্প্ৰচাৰ কৰিছিল। পাছত সেই ক্লিপসমূহ অনলাইন প্লেটফৰ্মৰ পৰা আঁতৰাই লোৱা হয়।
ইয়াৰ পিছত সামিটৰ আয়োজকসকলে বিষয়টো গুৰুত্বসহকাৰে লৈ বিশ্ববিদ্যালয়খনৰ ষ্টল এক্সপ’ স্থানৰ পৰা অপসাৰণ কৰে। চৰকাৰী মহলৰ মতে, উদ্ভাৱন আৰু প্ৰযুক্তিগত অগ্ৰগতিৰ দৰে গুৰুত্বপূৰ্ণ মঞ্চত কোনো ধৰণৰ বিভ্ৰান্তিকৰ উপস্থাপন গ্ৰহণযোগ্য নহয়।
ইফালে, বিশ্ববিদ্যালয়খনৰ পক্ষৰ পৰা প্ৰকাশ কৰা বিবৃতিত কোৱা হৈছে যে তেওঁলোকে ৰোব’ডগটো নিজে নিৰ্মাণ কৰা বুলি কোনো দাবী কৰা নাই। বৰঞ্চ বিশ্বৰ বিভিন্ন দেশৰ আধুনিক প্ৰযুক্তি শিক্ষাৰ্থীসকলৰ সন্মুখলৈ অনাৰ উদ্দেশ্যেই এইটো প্ৰদৰ্শন কৰা হৈছিল বুলি তেওঁলোকে দাবী কৰে।
ঘটনাটোৱে দেশত AI আৰু ৰ’বটিক্স খণ্ডত স্বচ্ছতা, স্বদেশী উদ্ভাৱনৰ প্ৰামাণিকতা আৰু প্ৰদৰ্শন নীতি-নিয়ম সন্দৰ্ভত নতুনকৈ আলোচনা আৰম্ভ কৰিছে।