হাইলাকান্দিত বানপানীৰ সৈতে মোকাবিলা কৰিবলৈ প্ৰশাসনৰ আগতীয়া প্ৰস্তুতি সভা

হাইলাকান্দিত বানপানীৰ সৈতে মোকাবিলা কৰিবলৈ প্ৰশাসনৰ আগতীয়া প্ৰস্তুতি সভা
প্ৰতিনিধি হাইলাকান্দি ২৪ ফেব্ৰুৱাৰীঃ আগন্তুক বাৰিষাৰ প্ৰতি লক্ষ্য ৰাখি সম্ভাৱ্য বান পৰিস্থিতিৰ সৈতে মোকাবিলা কৰিবলৈ আগতীয়া প্ৰস্তুতি শক্তিশালী কৰাৰ বাবে হাইলাকান্দি জিলা প্ৰশাসনৰ দুৰ্যোগ ব্যৱস্থাপনা শাখাৰ উদ্যোগত মঙলবাৰে এক গুৰুত্বপূৰ্ণ প্ৰস্তুতি সভা অনুষ্ঠিত হয়। জিলা প্ৰশাসনৰ সন্মিলন কক্ষত অনুষ্ঠিত সভাত সভাপতিত্ব কৰে জিলা আয়ুক্ত অভিষেক জৈনে। বৈঠকত জিলাখনৰ বিভিন্ন গুৰুত্বপূৰ্ণ বিভাগৰ বিষয়াসকলৰ উপস্থিতিত দ্ৰুত আৰু ফলপ্ৰসূ উদ্ধাৰ অভিযান, সাহায্য বিতৰণ আৰু সম্ভাৱ্য বান পৰিস্থিতিত লোকচান হ্ৰাস কৰাৰ বাবে এক বিস্তৃত কাৰ্য্য পৰিকল্পনা গ্ৰহণ কৰাত বিশেষ গুৰুত্ব আৰোপ কৰা হয়। জিলা আয়ুক্তই সংশ্লিষ্ট সকলো বিভাগকে নিজ নিজ দায়িত্ব অনুযায়ী আগতীয়া প্ৰস্তুতিৰ সম্পূৰ্ণ ৰূপৰেখা প্ৰস্তুত কৰিবলৈ নিৰ্দেশ দিয়ে, যাতে জৰুৰীকালীন অৱস্থাত কোনো ধৰণৰ বিভ্ৰান্তি বা পলম নহয়। তেওঁ স্পষ্টভাৱে কয় যে জিলাখনৰ প্ৰতিটো ৰাজহ চক্ৰত একেধৰণৰ প্ৰস্তুতি সভা আয়োজন কৰিব লাগে আৰু বিপদজনক অঞ্চলৰ তালিকা স্থানীয় পৰ্যায়ত আপডেট কৰিব লাগে। ইয়াৰ উপৰিও বান উদ্ধাৰ অভিযানত ব্যৱহাৰৰ বাবে পৰ্যাপ্ত সংখ্যক থলুৱা নাও আগতীয়াকৈ চিনাক্ত কৰি সাজু কৰি ৰাখিবলৈ নিৰ্দেশ দিয়া হৈছিল। প্ৰয়োজন হ’লে নাওৰ মালিকৰ সৈতে পূৰ্বৰ সমন্বয়ৰ কথাও উল্লেখ কৰে। সাহায্য শিবিৰ স্থাপনৰ বাবে সম্ভাৱ্য নিৰাপদ স্থান চিনাক্ত কৰি তাত খোৱাপানী, অনাময়, বিদ্যুৎ আৰু স্বাস্থ্যসেৱাৰ নূন্যতম সুবিধা নিশ্চিত কৰিব লাগে বুলিও বৈঠকত সিদ্ধান্ত লোৱা হয়। বানপানীৰ পিছৰ সম্ভাৱ্য ৰোগৰ সৈতে মোকাবিলা কৰিবলৈ ঔষধ আৰু চিকিৎসা দল সাজু কৰি ৰাখিবলৈ স্বাস্থ্য বিভাগক কোৱা হৈছিল। একে সময়তে পশুধন বিভাগক গৰু সুৰক্ষাৰ বাবে সুকীয়া পৰিকল্পনা ল’বলৈ নিৰ্দেশ দিয়া হৈছিল। ডিডিচি নাৰ্চিং বে’ৰ উপস্থিতিত অনুষ্ঠিত বৈঠকত বিভিন্ন বিভাগীয় বিষয়া আৰু চক্ৰ বিষয়াই যোৱা বছৰৰ বানপানীত ক্ষতিগ্ৰস্ত হোৱা বিভিন্ন আন্তঃগাঁথনি আৰু প্ৰকল্পৰ অগ্ৰগতিৰ পৰ্যালোচনা কৰে। বৰ্তমানেও অসম্পূৰ্ণ হৈ থকা মেৰামতিৰ কাম তৎক্ষণাত সম্পূৰ্ণ কৰিবলৈ সংশ্লিষ্ট বিভাগসমূহক কঠোৰ নিৰ্দেশনা দিয়া হয়। জিলা আয়ুক্তগৰাকীয়ে স্পষ্টকৈ উল্লেখ কৰে যে বান প্ৰতিৰোধ আৰু প্ৰত্যুত্তৰত কোনো ধৰণৰ গাফিলতি সহ্য কৰা নহ’ব। ইয়াৰ উপৰিও আন্তঃবিভাগীয় সমন্বয় শক্তিশালী কৰা, জৰুৰীকালীন যোগাযোগ ব্যৱস্থা সক্ৰিয় কৰি ৰখা, নিয়ন্ত্ৰণ কক্ষ সাজু কৰি ৰখা আৰু ক্ষেত্ৰ পৰ্যায়ত তথ্যৰ দ্ৰুত আদান-প্ৰদানৰ ওপৰত বিশেষ গুৰুত্ব দিয়া হৈছিল। বৈঠকত উপস্থিত বিষয়াসকলে নিজ নিজ বিভাগৰ প্ৰস্তুতি সম্পৰ্কে এক চমু প্ৰতিবেদন দাখিল কৰে। জিলা প্ৰশাসনে জনোৱা মতে, আগতীয়া পৰিকল্পনা, তীক্ষ্ণ নিৰীক্ষণ আৰু সমন্বিত পদক্ষেপৰ জৰিয়তে সম্ভাৱ্য বান পৰিস্থিতিত সাধাৰণ ৰাইজৰ জীৱন আৰু সম্পত্তি সুৰক্ষিত কৰাৰ বাবে সৰ্বোচ্চ সাৱধানতা অৱলম্বন কৰা হ’ব। প্ৰশাসনে আশা প্ৰকাশ কৰে যে সময়োপযোগী প্ৰস্তুতিয়ে চলিত বৰ্ষত বান-সংক্ৰান্তীয় ক্ষয়-ক্ষতিৰ বহু পৰিমাণে নিয়ন্ত্ৰণত সহায় কৰিব।