আন্তৰ্জাতিক মহিলা দিৱস উপলক্ষ্যে উত্তৰ-পূব সীমান্ত ৰেলৱেৰ দ্বাৰা গুৱাহাটী আৰু কামাখ্যা ষ্টেচনত মহিলাৰ বাবে স্বাস্থ্যসন্মত ভেণ্ডিং মেচিন স্থাপন

আন্তৰ্জাতিক মহিলা দিৱস উপলক্ষ্যে উত্তৰ-পূব সীমান্ত ৰেলৱেৰ দ্বাৰা গুৱাহাটী আৰু কামাখ্যা ষ্টেচনত মহিলাৰ বাবে স্বাস্থ্যসন্মত ভেণ্ডিং মেচিন স্থাপন
মালিগাঁও, পিএন চি ,৯ মাৰ্চ: আন্তৰ্জাতিক মহিলা দিৱস উপলক্ষে উত্তৰ-পূব সীমান্ত ৰেলৱেই দেওবাৰ ৮ মাৰ্চৰ দিনা এক বিশেষ পদক্ষেপ গ্ৰহণ কৰি গুৰুত্বপূৰ্ণ ৰেলৱে ষ্টেচনসমূহৰে ৰাজহুৱা স্থানসমূহত মহিলাৰ স্বাস্থ্য, মর্যাদা আৰু আৰাম বৃদ্ধি কৰাৰ লক্ষ্যেৰে মহিলাৰ বাবে বহুমূখী স্বাস্থ্যসন্মত সামগ্ৰীৰ ভেণ্ডিং মেচিন স্থাপন কৰিছে। এই পদক্ষেপৰ অংশ হিচাপে মুঠ ছটা মেচিন স্থাপন কৰা হৈছে, যাৰ ভিতৰত গুৱাহাটী ৰেলৱে ষ্টেচনত চাৰিটা আৰু কামাখ্যা ৰেলৱে ষ্টেচনত দুটা মেচিন স্থাপন কৰা হৈছে। এই মেচিনসমূহৰ জৰিয়তে মহিলা যাত্ৰীসকলে সহজতে প্ৰয়োজনীয় স্বাস্থ্যসন্মত সামগ্ৰী লাভ কৰাৰ ব্যৱস্থা কৰা হৈছে। উত্তৰ-পূব সীমান্ত ৰেলৱে মহিলা কল্যাণ সংস্থাৰ সভানেত্ৰী শালিনী শ্ৰীবাস্তৱে উত্তৰ-পূব সীমান্ত ৰেলৱেৰ মহাপ্ৰৱন্ধক শ্ৰী চেতন কুমাৰ শ্ৰীবাস্তৱৰ উপস্থিতিত এই মেচিনসমূহৰ উদ্বোধন কৰে। গুৱাহাটী আৰু কামাখ্যা ষ্টেচনে দৈনিক হাজাৰ হাজাৰ তীৰ্থযাত্ৰী, পৰ্যটক আৰু মহিলা যাত্ৰীৰ বাবে গুৰুত্বপূৰ্ণ প্ৰৱেশদ্বাৰ হিচাপে সেৱা আগবঢ়াই আহিছে আৰু এই মেচিনসমূহৰ স্থাপনৰ জৰিয়তে ভাৰতীয় ৰেলৱেৰ একত্ৰিত, মহিলা-হিতৈষী, সুৰক্ষিত ভ্ৰমণৰ পৰিৱেশ সৃষ্টিৰ দিশত ইয়াৰ দায়বদ্ধতাকে প্ৰতিফলিত কৰিছে। এই পদক্ষেপ (মহিলাৰ বাবে ঘনিষ্ঠ স্বাস্থ্যসন্মত শীৰ্ষ ব্ৰেণ্ড) আৰু প্ৰিয়া কমিউনিকেচনৰ সহযোগত গ্ৰহণ কৰা হৈছে আৰু ইয়াৰ উদ্দেশ্য হৈছে ৰেলৱে পৰিসৰত মহিলা যাত্ৰীসকলৰ ঋতুচক্ৰ সময়ত স্বাস্থ্য আৰু স্বচ্ছতাৰ সুবিধাক সৱলীকৰণ কৰা। এই আধুনিক, প্ৰযুক্তি-সক্ষম মেচিনসমূহে ভাৰতত ঋতুচক্ৰ স্বাস্থ্যসন্মত সামগ্ৰীৰ বিক্ৰয়ৰ ক্ষেত্ৰত এক নতুন দিশ প্ৰদান কৰাৰ লগতে মহিলা যাত্ৰীসকলৰ বাবে সুবিধাজনক উপায় আগবঢ়াইছে। মহিলা যাত্ৰীসকলক অধিক সঁহাৰি প্ৰদানৰ উদ্দেশ্যে এই মেচিনসমূহত ৰেল যাত্ৰীসকলৰ বাবে বিশেষ ৰেহাই মূল্যত প্ৰয়োজনীয় স্বাস্থ্যসন্মত সামগ্ৰী উপলব্ধ কৰি ভ্ৰমণৰ সময়চোৱাত সুবিধাজনক কৰি তোলা হৈছে। উত্তৰ-পূব সীমান্ত ৰেলৱেই পৰৱৰ্তী পৰ্যায়ত উত্তৰ-পূৰ্ব্বাঞ্চলৰ আন আন বহুতো ষ্টেচনত এই সুবিধা সম্প্ৰসাৰণ কৰাৰ পৰিকল্পনা কৰিছে। এই পদক্ষেপে এই বিশ্বাসক দৃঢ় কৰি তুলিছে যে ঋতুচক্ৰৰ স্বাস্থ্য এক মৌলিক অধিকাৰ আৰু ৰাজহুৱা আন্তঃগাঁথনিত মহিলাৰ স্বাস্থ্য, মর্যাদা আৰু স্বাস্থ্যসন্মত প্ৰৱেশাধিকাৰক অগ্ৰাধিকাৰ প্ৰদানৰ গুৰুত্বকেই এই সুবিধাই উজ্জ্বল কৰি তুলিছে।
ৰেলৱেৰ সমাগম স্থানসমূহত স্বাস্থ্যসন্মত সমাধান সংযোজন কৰি এই পদক্ষেপে ঋতুচক্ৰক আৱৰি থকা দীৰ্ঘদিনীয়া সামাজিক নিষিদ্ধতাক ভাঙিবলৈ সহায় কৰি মহিলাৰ বাবে স্বাস্থ্যৰ বিষয়ে মুকলি আৰু সুস্থ আলোচনাকেই উৎসাহিত কৰিছে। এই সহযোগিতামূলক পদক্ষেপৰ জৰিয়তে উত্তৰ-পূব সীমান্ত ৰেলৱে আৰু ইয়াৰ সহযোগী সংস্থাসমূহে ঋতুচক্ৰৰ সময়ৰ সুলভ স্বাস্থ্যসন্মত সা-সুবিধাসমূহৰ এক শক্তিশালী উদাহৰণ স্থাপন কৰি মহিলাসকলক সৱলীকৰণ কৰাৰ লগতে অন্তৰ্ভুক্তিমূলক ৰাজহুৱা সেৱা সবলীকৰণ কৰিব বিচাৰে।