মাণ্ডাৰদিছাত ৰেলত শিলগুটি নিক্ষেপ কৰাৰ অপৰাধত গ্ৰেপ্তাৰ এজন যুৱক
হাফলঙ, পিএন চি, ৩০ মাৰ্চ: ৰেল সুৰক্ষা বাহিনীয়ে দেওবাৰে এখন যাত্ৰীবাহী ৰে’ল লক্ষ্য কৰি শিলগুটি নিক্ষেপ কৰাৰ অভিযোগত এজন যুৱকক গ্ৰেপ্তাৰ কৰে৷ ধৃত এই যুবক মৰিগাঁও জিলাৰ মৈৰাবাৰী আৰক্ষী থানাৰ অন্তৰ্গত দুৰাবন্ধী বিল গাঁৱৰ বাসিন্দা আৰু নাম আমজাদ আলী (২৬) ৷ ডিমা হাছাও জিলাৰ মান্দৰদিছা আৰু লামডিং ৰে’ল জঙশনৰ মাজত ১৩১৭৬ আপ শিলচৰ –শিয়ালদহ কাঞ্চনজংঘা এক্সপ্ৰেছত ২৯ মাৰ্চত এই নিক্ষেপ সংঘটিত হৈছিল৷ ঘটনাৰ পিছতে ৰে’ল আইনৰ ১৫৩ নং ধাৰাত (কেছ নং ২৭/২০২৬) এটা গোচৰ ৰুজু কৰা হয়৷ গোচৰৰ তদন্তৰ ভিত্তিত দেওবাৰে আৰ পি এফ আউটপোষ্ট মাণ্ডাৰদিছাৰ কাৰ্যবাহী বিষয়া এ এছ আই চিএছ দাসে অভিযুক্ত আমজাদ আলীক আটক কৰে৷ আৰ পি এফৰ সূত্ৰই আৰু জনোৱা মতে, সকলো প্ৰয়োজনীয় আইনী আনুষ্ঠানিকতা সম্পূৰ্ণ কৰাৰ পিছত গ্ৰেপ্তাৰ কৰা ব্যক্তিজনক গোচৰৰ নথি-পত্ৰৰ সৈতে হাফলঙৰ বিশেষ ৰে’লৱে দণ্ডাধীশ আদালতত হাজিৰ কৰোৱা হয়৷
