নগাঁৱৰ কঠীয়াতলী উন্নয়ন খণ্ডত জনজাতীয় গৰিমা উৎসৱ উদযাপন ,২০০ লোকক চিকিৎসা প্ৰদান
পঙ্কজ নাথ, ষ্টাফ ৰিপৰ্টাৰ , ২১ মে’: কেন্দ্ৰীয় চৰকাৰৰ জনভাগিদাৰী অভিযানৰ অংশ হিচাপে বুধবাৰে নগাঁও জিলাৰ কঠীয়াতলী উন্নয়ন খণ্ডৰ অন্তগত কঠীয়াতলী আৰু দক্ষিণ ননৈ পঞ্চায়তত জনজাতীয় গৰিমা উৎসৱ, ২০২৬ পালন কৰা হয় । জন ভাগিদাৰী অভিযানৰ অন্তৰ্গত নগাঁও জিলা প্ৰশাসনৰ উদ্যোগত আয়োজিত এই কাৰ্যসূচীত প্ৰায় দুই শতাধিক ৰোগীক চকুকে ধৰি বিভিন্ন ৰোগৰ চিকিৎসা সেৱা আগবঢ়োৱাৰ বাবে ঔষধ যোগান ধৰা হয় । এই কাৰ্যসূচীত বিশেষজ্ঞ চিকিৎসক ডাঃ দীপাংকৰ বৰাৰ নেতৃত্বত এটি স্বাস্থ্যকৰ্মীৰ দলে প্ৰায় ডেৰ শতাধিক ৰোগীৰ স্বাস্থ্য পৰীক্ষা কৰে । ননৈ গাঁও পঞ্চায়তৰ সচিব গীতাঞ্জলি মুদৈয়ে এই সম্পৰ্কত কয়, “আজি এটা ভাল দিন আমাৰ কাৰণে । দক্ষিণ ননৈ পঞ্চায়তৰ আমাৰ এখন গাঁও আছে ছোট কন্দলি গ্ৰাণ্ট । সেইখন গাঁৱে ইয়াত অংশগ্ৰহণ কৰিছে । কেন্দ্ৰীয় চৰকাৰৰ জনজাতি পৰিক্ৰমা মন্ত্ৰণালয়ৰ পৰামৰ্শক্ৰমে আয়োজিত এই অনুষ্ঠানৰ মুখ্য উদ্দেশ্য হৈছে চাহ জনজাতীয় মানুহখিনিক চৰকাৰী সা-সুবিধা সমূহৰ প্ৰতি সচেতন কৰা ।” তেওঁ লগতে কয়, “তেওঁলোকে আধাৰ লিংকক লৈ বহু সমস্যাত পৰে; সেই ব্যৱস্থাও ইয়াত কৰিবলৈ যত্ন কৰিছোঁ । তেওঁলোকৰ কৃষি ক্ষেত্ৰত সমস্যা আছে । যত্ন কৰিছোঁ ইয়াত এটা কেম্প কৰি একেলগে সুবিধা কৰি দিব পাৰোঁ নেকি । মানুহখিনিৰ লগতো কথা-বতৰা হৈছোঁ । যিখিন ৰাইজ আহিছে তেওঁলোক যথেষ্টখিনি উপকৃত হৈছে । তেওঁলোকৰ লগত কথাপাতি তেওঁলোক উপকৃত হোৱা বুলি জানি বহুতেই ভাল লাগিছে আৰু এয়া অসম চৰকাৰ তথা আমাৰ বিভাগৰ যথেষ্ট ভাল পদক্ষেপ বুলিব পাৰি । এই মানুহখিনি এনেকুৱা শ্ৰেণীৰ মানুহ, তেওঁলোক নিজেই ওলাই গৈ সা-সুবিধাবোৰ ল’ব নাজানে। এনেধৰণে সচেতন কৰিব পাৰিলে যথেষ্ট আগবাঢ়ি যাব । তেওঁলোক আগবাঢ়িলে আমাৰ সমাজখন আগবাঢ়িব । কঠীয়াতলী পঞ্চায়তৰ সভানেত্ৰী অঞ্জনা ভূঞাই কয় যে, এই আঁচনিৰ অধীনত আমাৰ গাঁওখন নিৰ্বাচিত হৈছে । ইয়াত বহু পিছপৰা শ্ৰেণীৰ লোক আছে । আঁচনিখনৰ জৰিয়তে বহু লোক উপকৃত হ’ব বুলি ভাবিছোঁ । চৰকাৰক বহুত ধন্যবাদ দিছোঁ ।” ইফালে কঠিয়াতলী পঞ্চায়তৰ সচিব ৰাজীৱ দেৱগোস্বামীয়ে কয়, “আমাৰ কঠীয়াতলী পঞ্চায়তৰ অধীনৰ নামবৰ লালুংগাঁও জনজাতীয় গৌৰৱ দিৱসত নিৰ্বাচিত হৈছিল । আমাৰ কঠীয়াতলী পঞ্চায়তৰ পৰা দুখন পঞ্চায়তৰ দুখন গাঁও নিৰ্বাচিত হৈছিল । কঠীয়াতলী পঞ্চায়তৰ নামবৰ লালুংগাঁও আৰু দক্ষিণ ননৈ গাঁও পঞ্চায়তৰ ছোট কন্দলী গ্ৰাণ্ট গাঁও । দুয়োটা পঞ্চায়তত শিবিৰবোৰ চলাই আছোঁ । জনজাতীয় গৌৰৱ দিৱসৰ জৰিয়তে আমি আদিবাসী লোকসকলক স্বাস্থ্য পৰীক্ষা হওক, চকু পৰীক্ষা হওক বিভিন্ন শিতানত আমি যিমানখিনি কৰিব পাৰোঁ উপলব্ধ কৰোৱা হৈছে । ৰাইজৰ লগতো বিভিন্ন বাৰ্তালাপ কৰিছোঁ । তেওঁলোক উপকৃত হৈছে বুলি আমাক জনাইছে । যোৱা বছৰো এই শিবিৰ আমি অনুষ্ঠিত কৰিছিলোঁ । এইবাৰো চৰকাৰী নিদেৰ্শ অনুসৰি চলাই আছোঁ । জিলা তথ্য আৰু জনসংযোগ বিষয়া বিকাশ শৰ্মাই জনোৱা মতে জিলাখনৰ অন্যান্য প্ৰান্ততো যোৱা ১৮ মে’ ৰ পৰা অহা ২৫ মে’লৈকে এই অভিযান চলিব ।
