সুস্থ বাৰ্ধক্য আৰু সামগ্ৰিক সুস্থতাক কেন্দ্ৰ কৰি মাৰ্ঘেৰিটাত ১২ সংখ্যক আন্তঃৰাষ্ট্ৰীয় যোগ দিৱস পালন
পঙ্কজ নাথ, ষ্টাফ ৰিপৰ্টাৰ , ২১ জুন : মাৰ্ঘেৰিটা সম-জিলা আয়ুক্তৰ কাৰ্যালয়ে মাৰ্ঘেৰিটা মহাবিদ্যালয়ৰ এনচিচি, এনএছএছ আৰু যোগ কোষৰ সহযোগত আজি উৎসাহ-উদ্দীপনা আৰু ব্যাপক অংশগ্ৰহণেৰে ১২ সংখ্যক আন্তঃৰাষ্ট্ৰীয় যোগ দিৱস পালন কৰে। চলিত বৰ্ষৰ বিষয়বস্তু “সুস্থ বাৰ্ধক্যৰ বাবে যোগ” (Yoga for Healthy Ageing)-এ সকলো বয়সৰ লোকৰ শাৰীৰিক, মানসিক আৰু আৱেগিক সুস্থতা বৃদ্ধিত যোগৰ গুৰুত্বৰ ওপৰত আলোকপাত কৰাৰ লগতে সুস্থ আৰু সক্ৰিয় জীৱনধাৰা গঢ়ি তোলাৰ বাৰ্তা প্ৰেৰণ কৰে। কাৰ্যসূচীৰ অংশ হিচাপে বিশিষ্ট যোগগুৰু দীপ আচার্যই যোগাসন আৰু প্ৰাণায়ামৰ বিভিন্ন কৌশল প্ৰদৰ্শন কৰাৰ লগতে উপস্থিত অংশগ্ৰহণকাৰীসকলক অনুশীলন কৰায়। তেওঁ দৈনন্দিন জীৱনত নিয়মিত যোগচৰ্চাৰ উপকাৰিতাৰ বিষয়েও বিস্তৃতভাৱে অৱগত কৰে। উদযাপনৰ অংশ হিচাপে ছাত্ৰ-ছাত্ৰীসকলৰ মাজত এখন যোগ প্ৰতিযোগিতাৰ আয়োজন কৰা হয়। প্ৰতিযোগিতাত অংকুশ দে-এ প্ৰথম স্থান, মেনকা প্ৰধান-এ দ্বিতীয় স্থান আৰু যুৱৰাজ মাহাতো-এ তৃতীয় স্থান লাভ কৰে। বিজয়ীসকলক তেওঁলোকৰ উৎকৃষ্ট প্ৰদৰ্শনৰ বাবে সম্বৰ্ধনা জনোৱা হয়। কাৰ্যসূচীত বিশেষ আকৰ্ষণৰ সৃষ্টি কৰে মাৰ্ঘেৰিটাৰ ৰোহিত দেবনাথে, যিয়ে ৰাজ্যিক আৰু ৰাষ্ট্ৰীয় পৰ্যায়ৰ যোগ প্ৰতিযোগিতাত অংশগ্ৰহণ কৰি সুনাম অৰ্জন কৰিছে। তেওঁ বিভিন্ন জটিল যোগাসন প্ৰদৰ্শন কৰি নিজৰ নমনীয়তা, ভাৰসাম্য আৰু দক্ষতাৰ মনোমোহা নিদৰ্শন দাঙি ধৰে। উক্ত কাৰ্যসূচীত ৰাহুল দলে, এ চি এছ, সম-জিলা আয়ুক্ত, মাৰ্ঘেৰিটা, প্ৰীতিৰেখা গগৈ, এ চি এছ, সহকাৰী আয়ুক্ত, অন্যান্য প্ৰশাসনিক বিষয়া-কৰ্মচাৰী, সংবাদ মাধ্যমৰ প্ৰতিনিধি, ছাত্ৰ-ছাত্ৰী আৰু স্থানীয় নাগৰিকসকলে উপস্থিত থাকি অনুষ্ঠানটোক সাফল্যমণ্ডিত কৰি তোলে।
