হাইলাকান্দিত ‘হোম ভোটিং’ ব্যৱস্থাক অধিক শক্তিশালী কৰিবলৈ ক্ষেত্ৰত নামিল জিলা আয়ুক্ত অভিষেক জৈন*
প্ৰীতম দাস হাইলাকান্দি ৩১ মাৰ্চ: আগন্তুক বিধানসভা নিৰ্বাচনক সন্মুখত ৰাখি হোম ভোটিং (Home Voting) প্ৰক্ৰিয়াক অধিক কাৰ্যকৰী স্বচ্ছ আৰু সুসংগঠিত কৰি তুলিবলৈ হাইলাকান্দি জিলা প্ৰশাসনে তৎপৰতা বৃদ্ধি কৰিছে। বিশেষকৈ বয়োজ্যেষ্ঠ নাগৰিক আৰু বিশেষভাৱে সক্ষম ভোটাৰসকলৰ ভোটাধিকাৰ নিশ্চিত কৰাৰ ক্ষেত্ৰত এই ব্যৱস্থাক সৰ্বাধিক গুৰুত্ব প্ৰদান কৰা হৈছে।এই প্ৰসংগত হাইলাকান্দিৰ জিলা নিৰ্বাচনী বিষয়াসকলৰ প্ৰধান তথা জিলা আয়ুক্ত শ্ৰী অভিষেক জৈন (IAS)য়ে মঙলবাৰে এছ.এছ. কলেজ পৰিদৰ্শন কৰি ‘হোম ভোটিং’ সম্পৰ্কীয় প্ৰশিক্ষণ কাৰ্যসূচীৰ সামগ্ৰিক অগ্ৰগতি বিস্তৃতভাৱে পৰ্যালোচনা কৰে। প্ৰশিক্ষণ কেন্দ্ৰত উপস্থিত হৈ তেওঁ দায়িত্বপ্ৰাপ্ত বিষয়া আৰু কৰ্মচাৰীসকলৰ সৈতে পোনপটীয়া মতবিনিময় কৰে আৰু সমগ্ৰ প্ৰক্ৰিয়াৰ সূক্ষ্ম দিশসমূহৰ বিষয়ে অৱগত হয়।পৰিদৰ্শনৰ সময়ত জিলা আয়ুক্তজনে প্ৰশিক্ষণপ্ৰাপ্ত কৰ্মচাৰীসকলৰ প্ৰস্তুতি, দায়িত্ব বণ্টন আৰু ক্ষেত্ৰস্তৰত কাৰ্যকৰী ৰূপায়ণৰ পৰিকল্পনা গভীৰভাৱে পৰীক্ষা কৰে। লগতে ভোটগ্ৰহণত ব্যৱহাৰ কৰা প্ৰয়োজনীয় সামগ্ৰীসমূহ যাতে সময়মতে আৰু সুশৃঙ্খলভাৱে সংশ্লিষ্ট দলসমূহৰ ওচৰলৈ পঠিওৱা হয়, তাৰ বাবে বিতৰণ ব্যৱস্থাৰ ওপৰত বিশেষ গুৰুত্ব আৰোপ কৰে। তেওঁ স্পষ্ট নিৰ্দেশ দিয়ে যে কোনো ধৰণৰ ত্ৰুটি বা বিলম্ব নোহোৱাকৈ প্ৰতিটো ধাপ নিখুঁতভাৱে সম্পন্ন হ’ব লাগিব।এই উপলক্ষে জিলা আয়ুক্ত অভিষেক জৈনে কয় হোম ভোটিং এটা অত্যন্ত গুৰুত্বপূৰ্ণ ব্যৱস্থা, যাৰ জৰিয়তে সমাজৰ সেইসকল ভোটাৰৰ ওচৰ পোৱা সম্ভৱ হয় যিসকলে শাৰীৰিক অসুবিধা বা বাৰ্ধক্যৰ বাবে ভোটকেন্দ্ৰত উপস্থিত থাকিব নোৱাৰে। সেয়েহে এই প্ৰক্ৰিয়াটো সম্পূৰ্ণ স্বচ্ছ নিখুঁত আৰু বাধাহীন কৰি ৰখা আমাৰ অন্যতম মুখ্য দায়িত্ব।তেওঁ আৰু কয় যে নিৰ্বাচন আয়োগৰ নিৰ্ধাৰিত সকলো নিৰ্দেশনা কঠোৰভাৱে মানি চলিব লাগিব আৰু প্ৰতিজন বিষয়া কৰ্মচাৰীয়ে নিজৰ দায়িত্ব সঠিকভাৱে পালন কৰিব লাগিব। কোনো ধৰণৰ অৱহেলা বা গাফিলতি নোহোৱাটো নিশ্চিত কৰিবলৈ তেওঁ সংশ্লিষ্ট সকলোকে সতৰ্ক কৰে।উল্লেখযোগ্য যে এই হোম ভোটিং ব্যৱস্থাৰ জৰিয়তে নিৰ্দিষ্ট যোগ্যতাসম্পন্ন বয়োজ্যেষ্ঠ নাগৰিক আৰু বিশেষভাৱে সক্ষম ব্যক্তিসকলে নিজ ঘৰতে বহি ভোটাধিকাৰ প্ৰয়োগ কৰাৰ সুবিধা লাভ কৰিব। এই ব্যৱস্থাক সফলভাৱে ৰূপায়ণ কৰিবলৈ জিলা প্ৰশাসনে ব্যাপক প্ৰস্তুতি গ্ৰহণ কৰিছে।জিলা প্ৰশাসনৰ এই পদক্ষেপত সাধাৰণ ৰাইজৰ মাজত ইতিবাচক সঁহাৰি দেখা গৈছে আৰু আশা কৰা হৈছে যে ইয়াৰ ফলত আগন্তুক নিৰ্বাচনত ভোটদানৰ হাৰ অধিক বৃদ্ধি পাব। লগতে গণতান্ত্ৰিক প্ৰক্ৰিয়াত সকলো শ্ৰেণীৰ লোকৰ অংশগ্ৰহণ নিশ্চিত কৰাৰ ক্ষেত্ৰত ই এক গুৰুত্বপূৰ্ণ পদক্ষেপ হিচাপে বিবেচিত হৈছে।
