কেন্দ্ৰীয় মন্ত্ৰী জ্যোতিৰাদিত্য এম সিন্ধিয়াই অৰুণাচল প্ৰদেশক ভাৰতৰ শীৰ্ষস্থানীয় জৈৱিক কিৱি গন্তব্যস্থান হিচাপে আত্মপ্ৰকাশ কৰাৰ বিপুল সম্ভাৱনাৰ ওপৰত আলোকপাত

:

কেন্দ্ৰীয় মন্ত্ৰী জ্যোতিৰাদিত্য এম সিন্ধিয়াই “অৰুণাচল কিৱি: অৰুণাচল প্ৰদেশৰ ইউএছপি” মিছনৰ শুভাৰম্ভণি কৰে

প্ৰধানমন্ত্ৰী নৰেন্দ্ৰ মোদীৰ “বিকশিত নৰ্থ ইষ্ট” দৃষ্টিভংগীৰ অধীনত অৰুণাচল প্ৰদেশৰ জৈৱিক কিৱি বিশ্ববজাৰত এক নতুন পৰিচয় গঢ়িবলৈ সাজু

কেন্দ্ৰীয় মন্ত্ৰী জ্যোতিৰাদিত্য এম সিন্ধিয়াই অৰুণাচল প্ৰদেশক ভাৰতৰ শীৰ্ষস্থানীয় জৈৱিক কিৱি গন্তব্যস্থান হিচাপে আত্মপ্ৰকাশ কৰাৰ বিপুল সম্ভাৱনাৰ ওপৰত আলোকপাত কৰে

ইটানগৰ, পিএন চি, ২১ মে :উত্তৰ-পূৰ্বাঞ্চল উন্নয়ন আৰু যোগাযোগ বিভাগৰ কেন্দ্ৰীয় মন্ত্ৰী জ্যোতিৰাদিত্য এম সিন্ধিয়াই বুধবাৰে “অৰুণাচল কিৱি: অৰুণাচল প্ৰদেশৰ ইউএছপি — অৰুণাচল প্ৰদেশৰ বাবে ক্লাষ্টাৰভিত্তিক কিৱি খেতি আৰু মূল্য শৃংখল উন্নয়ন অভিযান” শীৰ্ষক এক গুৰুত্বপূৰ্ণ অভিযানৰ শুভাৰম্ভণি কৰে। এই অনুষ্ঠানত অৰুণাচল প্ৰদেশৰ মুখ্য সচিব মনীষ কুমাৰ গুপ্তা আৰু ড’নাৰ মন্ত্ৰালয়ৰ সচিব সঞ্জয় জাজুৱো উপস্থিত থাকে।

প্ৰায় ১৬৭ কোটি টকা ব্যয়সাপেক্ষ এই “মিছন অন অৰুণাচল কিৱি: অৰুণাচল প্ৰদেশৰ ইউএছপি” সমগ্ৰ চৰকাৰভিত্তিক আৰু অভিসৰণ-নেতৃত্বাধীন পদ্ধতিৰে পৰিকল্পনা কৰা হৈছে। ড’নাৰ মন্ত্ৰালয়ৰ নেতৃত্বত কৃষি আৰু কৃষক কল্যাণ মন্ত্ৰালয়, গ্ৰামোন্নয়ন মন্ত্ৰালয়, খাদ্য প্ৰক্ৰিয়াকৰণ উদ্যোগ মন্ত্ৰালয়ৰ বিভিন্ন আঁচনিৰ সৈতে সমন্বয় সাধন কৰি এই পদক্ষেপ গ্ৰহণ কৰা হৈছে। লগতে নাবাৰ্ড, আইচিএআৰ-চিআইটিএইচ, এপেডা, নেৰামেক আৰু প্ৰতিশ্ৰুতিবদ্ধ ব্যক্তিগত বিনিয়োগকাৰীসকলেও এই অভিযানত সক্ৰিয়ভাৱে অংশগ্ৰহণ কৰিছে। মূল্য শৃংখলৰ প্ৰতিটো স্তৰৰ অংশীদাৰৰ মতামত আৰু প্ৰয়োজনীয়তাক সন্মান জনাই মিছনটোৰ ৰূপৰেখা প্ৰস্তুত কৰা হৈছে, যাতে গ্ৰহণ কৰা হস্তক্ষেপসমূহ বাস্তৱ পৰিস্থিতি আৰু অৰুণাচলৰ কিৱি-কৃষক সম্প্ৰদায়ৰ আকাংক্ষাৰ সৈতে সম্পূৰ্ণ সামঞ্জস্যপূর্ণ হয়।

এই অভিযানে জিৰো উপত্যকা (নামনি সুৱনশিৰি), ডিৰাং আৰু কলাকটাং (পশ্চিম কামেং), শি-ইয়োমি আৰু দিবাং উপত্যকাত চিনাক্ত কৰা ছয়টা সংহত ক্লাষ্টাৰ-স্তৰৰ চপোৱাৰ পিছৰ ব্যৱস্থাপনা কেন্দ্ৰৰ সৈতে ক্লাষ্টাৰভিত্তিক পদ্ধতি গ্ৰহণ কৰিছে। অভিযানৰ অধীনত ৩০ৰো অধিক কৌশলগত হস্তক্ষেপৰ জৰিয়তে কিৱি মূল্য শৃংখলৰ মুখ্য অন্তৰায়সমূহ দূৰ কৰাৰ লক্ষ্য নিৰ্ধাৰণ কৰা হৈছে। ইয়াৰ ভিতৰত আছে মূল্য উপলব্ধিৰ ব্যৱধান হ্ৰাস, অৰুণাচলৰ এনপিঅ’পি জৈৱিক প্ৰমাণপত্ৰ পুনৰুজ্জীৱিত কৰা, ৭ৰ পৰা ১০ দিনৰ বাধ্যতামূলক তৎকালীন বিক্ৰীৰ প্ৰৱণতা ৰোধ কৰিবলৈ শীতল শৃংখল আৰু চপোৱাৰ পিছৰ আন্তঃগাঁথনি গঢ়ি তোলা, আৰু ৰোপণ, উৎপাদন, প্ৰক্ৰিয়াকৰণ, ব্ৰেণ্ডিং, অনুসৰণযোগ্যতা, ৰপ্তানি আৰু অভিজ্ঞতাভিত্তিক কৃষি পৰ্যটনক সামৰি এক ঐক্যবদ্ধ পৰিৱেশ তন্ত্ৰত হাজাৰ হাজাৰ কৃষক পৰিয়ালক সংযুক্ত কৰা।

কেন্দ্ৰীয় মন্ত্ৰীগৰাকীয়ে প্ৰধানমন্ত্ৰী নৰেন্দ্ৰ মোদীৰ সেই দৃষ্টিভংগীৰ কথা পুনৰ উল্লেখ কৰে, যাৰ মূল লক্ষ্য হৈছে কৃষকসকলক সমগ্ৰ কৃষি মূল্য শৃংখলৰ প্রকৃত অংশীদাৰ হিচাপে প্ৰতিষ্ঠা কৰা — “পামৰ পৰা কাঁটাচামুচলৈকে।” এই পদক্ষেপৰ অভিসৰণ-চালিত স্বৰূপৰ ওপৰত গুৰুত্ব আৰোপ কৰি তেওঁ কয়—
“উত্তৰ-পূৰ্বাঞ্চলৰ আটাইকেইখন ৰাজ্যৰ সৈতে গঠিত উচ্চ পৰ্যায়ৰ টাস্ক ফ’ৰ্চ আৰু আটাইকেইখন ৰাজ্যৰ মুখ্যমন্ত্ৰী আৰু চৰকাৰৰ সহযোগত আমি প্ৰতিখন ৰাজ্যৰ বাবে একক আৰু স্বকীয় ‘ইউনিক ছেলিং প্ৰপজিশ্বন’ চিহ্নিত কৰিছোঁ। মিজোৰামৰ আদা, নাগালেণ্ডৰ কফি, ছিকিমৰ জৈৱিক কৃষি, মণিপুৰৰ প’লো ঐতিহ্য, অসমৰ মুগা ৰেচম, মেঘালয়ৰ লাকাডং হালধি আৰু এতিয়া অৰুণাচল প্ৰদেশৰ জৈৱিক কিৱি—এই সকলো উদ্যোগে উত্তৰ-পূৰ্বাঞ্চলৰ স্বকীয় শক্তিক বিশ্বমানৰ মূল্য শৃংখললৈ ৰূপান্তৰিত কৰাৰ দিশত এক নতুন অধ্যায় সূচনা কৰিছে।”

“ড’নাৰ মন্ত্ৰালয়, অৰুণাচল প্ৰদেশ চৰকাৰ আৰু সংশ্লিষ্ট সকলো অংশীদাৰ প্ৰতিষ্ঠানক আন্তৰিক অভিনন্দন জনাইছোঁ। এই পদক্ষেপ কেৱল চৰকাৰী আঁচনি নহয়; ই ‘সমগ্ৰ চৰকাৰ’ আৰু ‘সমগ্ৰ ভাৰত’ দৃষ্টিভংগীৰ এক উৎকৃষ্ট নিদৰ্শন। নাবাৰ্ড, খাদ্য প্ৰক্ৰিয়াকৰণ উদ্যোগ মন্ত্ৰালয়, আইচিএআৰ, এপেডা আৰু ব্যক্তিগত খণ্ডৰ সক্ৰিয় অংশগ্ৰহণে কৃষকৰ পৰা বজাৰলৈকে সমগ্ৰ কিৱি মূল্য শৃংখল শক্তিশালী কৰাৰ এক যুগান্তকাৰী আৰ্হি গঢ়ি তুলিছে।”

মন্ত্ৰীগৰাকীয়ে উল্লেখ কৰে যে “অৰুণাচল কিৱি: অৰুণাচল প্ৰদেশৰ ইউএছপি” অভিযানৰ মূল লক্ষ্য হৈছে অৰুণাচল প্ৰদেশক সীমিত বিপণন সুযোগসম্পন্ন কিৱি উৎপাদনকাৰী অঞ্চলৰ পৰা এক প্ৰিমিয়াম, অনুসৰণযোগ্য আৰু একক-উৎপত্তিৰ জৈৱিক কিৱি অৰ্থনীতিলৈ ৰূপান্তৰিত কৰা। বৰ্তমান বছৰি ৭,০৫০ মেট্ৰিক টনৰো অধিক উৎপাদন সত্ত্বেও বহু কৃষকে চি-গ্ৰেড ফলৰ বাবে প্ৰতি কিলোগ্ৰামত মাত্ৰ ২০–৪০ টকা আৰু এ-গ্ৰেড ফলৰ বাবে গড়ে ১২০ টকা লাভ কৰে, আনহাতে আমদানিকৃত কিৱিয়ে দেশীয় আৰু আন্তঃৰাষ্ট্ৰীয় বজাৰত বহুগুণ অধিক মূল্য লাভ কৰে। তেওঁ মিছনৰ মুখ্য লক্ষ্যসমূহৰ ৰূপৰেখা দাঙি ধৰি কয় যে ইয়াৰ জৰিয়তে ফলৰ শেল্ফ লাইফ বৃদ্ধি, বাধ্যতামূলক তৎকালীন বিক্ৰী হ্ৰাস, ২,০০০ মেট্ৰিক টন শীতল শৃংখল ক্ষমতা সৃষ্টি, মূল্য সংযোজন আৰু প্ৰক্ৰিয়াকৰণ সুবিধা উন্নয়ন, কিৱি-ভিত্তিক ষ্টাৰ্ট-আপ উৎসাহ, কৃষকৰ আয় বৃদ্ধি আৰু ২০২৮-২৯ বিত্তীয় বৰ্ষৰ ভিতৰত “অৰুণাচল অৰ্গেনিক কিৱি”ক বিশ্ব ৰপ্তানি বজাৰত সুদৃঢ় স্থান প্ৰদান কৰাৰ লক্ষ্য নিৰ্ধাৰণ কৰা হৈছে।
মন্ত্ৰীগৰাকীয়ে আৰু আলোকপাত কৰে যে এই পদক্ষেপৰ জৰিয়তে “ব্ৰেণ্ড নৰ্থ ইষ্ট”ৰ অংশ হিচাপে “অৰুণাচল অৰ্গেনিক কিৱি”ক সংবাদ মাধ্যম অভিযান, আন্তঃৰাষ্ট্ৰীয় বাণিজ্য মেলা আৰু পাইলট ক্লাষ্টাৰত অভিজ্ঞতাভিত্তিক কিৱি-বাগিচা পৰ্যটনৰ জৰিয়তে বিশ্বমঞ্চত প্ৰতিষ্ঠা কৰাৰ পৰিকল্পনা কৰা হৈছে। তেওঁ উল্লেখ কৰে যে নৱেম্বৰ-জানুৱাৰী মাহত অৰুণাচলৰ স্বাভাৱিক চপোৱাৰ সময় নিউজিলেণ্ডৰ অফ-ছিজনৰ সৈতে মিলে, যাৰ ফলত দক্ষিণ-পূব এছিয়া, মধ্যপ্ৰাচ্য আৰু ইউৰোপৰ বজাৰত বিশেষ সুযোগ সৃষ্টি হৈছে। লগতে জিৰো উপত্যকা আৰু ডিৰাঙত ফাৰ্ম-ষ্টে আৰু “ফাৰ্ম-টু-ফৰ্ক” পৰ্যটন অভিজ্ঞতাৰ বিকাশৰ পৰিকল্পনাও গ্ৰহণ কৰা হৈছে।

মন্ত্ৰীগৰাকীয়ে কয় যে এই পদক্ষেপৰ প্ৰকৃত সফলতা তেতিয়াহে প্ৰতিফলিত হ’ব, যেতিয়া “অৰুণাচল অৰ্গেনিক কিৱি”য়ে দেশীয় আৰু আন্তঃৰাষ্ট্ৰীয় বজাৰত প্ৰিমিয়াম স্থান দখল কৰিব আৰু কিউআৰ-সক্ষম পেকেজিঙৰ জৰিয়তে প্ৰতিটো ফলৰ উৎস অনুসৰণযোগ্য হ’ব। ইয়াৰ ফলত কৃষকৰ মূল্য উপলব্ধি চাৰি গুণৰ পৰা ছয় গুণলৈ বৃদ্ধি পাব বুলি আশা কৰা হৈছে। তেওঁ “ব্ৰেণ্ড নৰ্থ ইষ্ট”ৰ বিস্তৃত দৃষ্টিভংগীৰ কথা উল্লেখ কৰি কয় যে ছিকিমৰ জৈৱিক কৃষি, মিজোৰামৰ আদা, ত্ৰিপুৰাৰ কুইন আনাৰস, নাগালেণ্ডৰ কফি, মেঘালয়ৰ লাকাডং হালধি আৰু অৰুণাচলৰ জৈৱিক কিৱি—প্ৰতিটো ৰাজ্যৰ এক স্বকীয় শক্তিক বিশ্ববজাৰত প্ৰতিষ্ঠা কৰাৰ লক্ষ্য লৈ এই উদ্যোগ আগবাঢ়িছে। তেওঁ কৃষক আৰু অংশীদাৰসকলক আশ্বস্ত কৰে যে চৰকাৰে তেওঁলোকৰ সৈতে “কাষে কাষে” থিয় দি অৰুণাচল প্ৰদেশৰ বাবে বিশ্বমানৰ বিশেষ জৈৱিক কিৱি পৰিৱেশ তন্ত্ৰ গঢ়ি তোলাৰ বাবে সম্পূৰ্ণৰূপে প্ৰতিশ্ৰুতিবদ্ধ।

অৰুণাচল প্ৰদেশৰ মুখ্যমন্ত্ৰী পেমা খাণ্ডুৱে এই মিছনক ৰাজ্যখনৰ কৃষি আৰু অৰ্থনৈতিক যাত্ৰাৰ এক ঐতিহাসিক মাইলৰ খুঁটি বুলি অভিহিত কৰি ড’নাৰ মন্ত্ৰালয়ক আন্তৰিক ধন্যবাদ জ্ঞাপন কৰে। তেওঁ উল্লেখ কৰে যে অৰুণাচল প্ৰদেশ ভাৰতৰ সৰ্ববৃহৎ কিৱি উৎপাদনকাৰী ৰাজ্য আৰু ২০২০ চনত এমঅ’ভিচিডি-এনইআৰৰ অধীনত জৈৱিক কিৱি প্ৰমাণপত্ৰ লাভ কৰা দেশৰ প্ৰথম ৰাজ্য। এই মিছনে সেই সাফল্যক কৃষকৰ সমৃদ্ধি, মূল্য সংযোজন আৰু বিশ্ববজাৰৰ সৈতে সংযোগৰ এক শক্তিশালী পথত ৰূপান্তৰিত কৰিব। তেওঁ আৰু কয় যে কিৱি উচ্চভূমি অঞ্চলসমূহত ঝুম চাষৰ এক বহনক্ষম বিকল্প হিচাপে আত্মপ্ৰকাশ কৰিছে আৰু ৰাজ্য চৰকাৰ এই মিছনক অৰুণাচল প্ৰদেশ কিৱি মিছন ২০২৫–৩৫ৰ সৈতে সমন্বয় সাধন কৰি সময়সীমাবদ্ধভাৱে ৰূপায়ণ কৰিবলৈ সম্পূৰ্ণৰূপে প্ৰতিশ্ৰুতিবদ্ধ।

ড’নাৰ মন্ত্ৰালয়ৰ সচিব সঞ্জয় জাজুৱে তেওঁৰ ভাষণত অৰুণাচল প্ৰদেশৰ উচ্চভূমি আৰু জৈৱিক কৃষি-অনুকূল জলবায়ু পৰিস্থিতিয়ে হেৱাৰ্ড আৰু এলিছন জাতৰ উচ্চমানৰ কিৱি উৎপাদনৰ বিপুল সম্ভাৱনা সৃষ্টি কৰিছে বুলি উল্লেখ কৰে। তেওঁ জানিবলৈ দিয়ে যে ৰাজ্যখনৰ ১৩খন জিলাত ৩,৫৮২ হেক্টৰতকৈ অধিক ভূমিত ১,৫০০ৰো অধিক কৃষকে কিৱি চাষত নিয়োজিত আছে। তেওঁ ক্লাষ্টাৰভিত্তিক আৰু অভিসৰণ-চালিত আৰ্হিৰ জৰিয়তে ক্ষুদ্ৰ কৃষকসকলক শীতল শৃংখল, কাৰিকৰী সহায়, ব্ৰেণ্ডিং আৰু বজাৰ সংযোগৰ সুবিধা সামূহিকভাৱে লাভ কৰাৰ সুযোগ সৃষ্টি হ’ব বুলি মন্তব্য কৰে।

অৰুণাচল প্ৰদেশ চৰকাৰৰ উদ্যান শস্য বিভাগৰ সচিব কোজ ৰিন্যিয়ে ধন্যবাদ জ্ঞাপন কৰি কেন্দ্ৰীয় মন্ত্ৰী, ড’নাৰ মন্ত্ৰালয়, ভাৰত চৰকাৰ, অংশীদাৰ মন্ত্ৰালয়সমূহ, প্ৰতিষ্ঠান, কৃষক, এফপিঅ’, উদ্যোগী আৰু সংশ্লিষ্ট সকলো অংশীদাৰক আন্তৰিক কৃতজ্ঞতা জ্ঞাপন কৰে। তেওঁ ৰাজ্য চৰকাৰৰ পক্ষৰ পৰা এই মিছন সময়সীমাবদ্ধ আৰু ফলপ্ৰসূভাৱে ৰূপায়ণৰ দৃঢ় প্ৰতিশ্ৰুতি পুনৰ ব্যক্ত কৰে।
এই পদক্ষেপৰ ফলত বহনক্ষম জীৱিকাৰ সৃষ্টি, চপোৱাৰ পিছৰ ক্ষতিৰ লক্ষণীয় হ্ৰাস, ফাৰ্ম গেটত উন্নত মূল্য নিশ্চিতকৰণ আৰু কিৱি মূল্য শৃংখলত গ্ৰাম্য যুৱক-যুৱতীৰ সক্ৰিয় অংশগ্ৰহণ নিশ্চিত হ’ব বুলি আশা কৰা হৈছে। জিৰো উপত্যকা আৰু ডিৰাঙৰ কিৱি কৃষকসকলে উষ্ম আদৰণি জনোৱা এই অনুষ্ঠানত কৃষক, এফপিঅ’, উদ্যোগী, বিভিন্ন উদ্যোগৰ অংশীদাৰ আৰু ড’নাৰ মন্ত্ৰালয় তথা অৰুণাচল প্ৰদেশ চৰকাৰৰ বিষয়াসকলে ব্যাপক উপস্থিতি জনায়।