উত্তৰ গুৱাহাটীত নিস্বাৰ্থ মঞ্চ অসমৰ উদ্যোগত আন্তঃৰাষ্ট্ৰীয় নাৰী দিৱস উদযাপন
পঙ্কজ নাথ, ষ্টাফ ৰিপৰ্টাৰ, ৯ মাৰ্চ: উত্তৰ গুৱাহাটীস্থিত ৰজাদুৱাৰ ক্লাব আৰু লাইব্ৰেৰী প্ৰাঙ্গনত নিস্বাৰ্থ মঞ্চ অসমৰ উদ্যোগত আন্তঃৰাষ্ট্ৰীয় নাৰী দিৱস উদযাপন কৰা হয়৷ অনুষ্ঠানটোত সমাজৰ বিভিন্ন স্তৰৰ মহিলাসকলৰ উপস্থিতিত নাৰী অধিকাৰ, সমতা আৰু সুৰক্ষাৰ বিষয়ত গুৰুত্বপূৰ্ণ আলোচনা অনুষ্ঠিত হয়৷ সভাখন সঞ্চালনা কৰে সমাজসেৱিকা ৰেণু দাসে৷ সভাৰ উদ্দেশ্য ব্যাখ্যা কৰে নিস্বাৰ্থ মঞ্চ অসমৰ সম্পাদিকা প্ৰণতি বৰুৱাই৷ তেওঁ নিজৰ বক্তব্যত কয় যে নাৰী অধিকাৰ আন্দোলন, সমতা আৰু মুক্তিৰ বাবে চলা ঐতিহাসিক সংগ্ৰামৰ স্মৃতিতেই আন্তঃৰাষ্ট্ৰীয় নাৰী দিৱস উদযাপন কৰা হয়৷ এই দিৱসত লিংগ সমতা, নাৰী ক্ষমতায়ন, প্ৰজনন অধিকাৰ আৰু নাৰী ওপৰত সংঘটিত হোৱা হিংসা-নিৰ্যাতনৰ দৰে গুৰুত্বপূৰ্ণ বিষয়সমূহৰ ওপৰত বিশেষ গুৰুত্ব আৰোপ কৰা হয়৷ নিস্বাৰ্থ মঞ্চ অসমৰ সভানেত্ৰী উষা দেৱীয়ে নিজৰ বক্তব্যত পক্ষপাতহীন সমাজ গঠনৰ ওপৰত গুৰুত্ব আৰোপ কৰি মহিলাসকলক ৰাজনীতি, সমাজ আৰু বিভিন্ন প্ৰতিষ্ঠানত সক্ৰিয়ভাৱে অংশগ্ৰহণ কৰিবলৈ আহ্বান জনায়৷ অনুষ্ঠানত কবি, সাহিত্যিক আৰু লেখিকা অৰুন্ধুতী শৰ্মাই বক্তব্য দাঙি ধৰি সমাজৰ বিভিন্ন ক্ষেত্ৰত মহিলাসকলৰ অৱদানৰ বিষয়ে আলোকপাত কৰে৷ আন বক্তাসকলৰ ভিতৰত ললিতা বৰুৱা, ননী নাথ, মুনু বৰকাকতি, মাকনি বৰকাকতি, থুলী নেৱাৰ, কনকলতা বৰুৱা, গংগা ভৰালী বৰ্মন, বিচিত্ৰা ভৰালী আৰু হিমা হাজৰিকা আদিয়ে বক্তব্য আগবঢ়ায়৷ অনুষ্ঠানত উদ্যোগী মহিলা আল্পনা বেজবৰুৱা, পিংকী মহন্ত, স্বপ্না ভৰালী আৰু প্ৰতিভা বৰাৰ লগতে ৮০ বছৰ ঊৰ্ধ্বৰ কেইবাজনো মহিলাক সম্বৰ্ধনা জনোৱা হয়৷ সাংস্কৃতিক অনুষ্ঠানৰ অংশ হিচাপে সুৰমা নাথ, পাৰ্ণিকা দাস, ইজুমণি বৰুৱা আৰু প্ৰণিতা তালুকদাৰে গীত পৰিবেশন কৰে৷ সভানেত্ৰীৰ ভাষণত নাৰীসকলক একত্ৰিত হৈ সমাজত সংঘটিত অন্যায়ৰ বিৰুদ্ধে দৃঢ়ভাৱে থিয় দিবলৈ আৰু সমাজ তথা ৰাষ্ট্ৰ গঠনত সক্ৰিয় ভূমিকা গ্ৰহণ কৰিবলৈ আহ্বান জনোৱা হয়৷ শতাধিক ব্যক্তিৰ উপস্থিতিত অনুষ্ঠিত সভাখনত শেষত শলাগৰ শৰাই আগবঢ়ায় নিস্বাৰ্থ মঞ্চ অসমৰ সম্পাদিকা প্ৰণতি বৰুৱাই৷ সভানেত্ৰীৰ ভাষণৰ পিছতে সভা ভংগ ঘোষণা কৰা হয়৷
