শগুণৰ উপস্থিতি হ্ৰাসকলৈ বিশেষজ্ঞ সৌৰভ বৰকটকীৰ উদ্বেগ প্ৰকাশ
দুৰ্নীতিৰ দৰ্পণ, ষ্টাফ ৰিপৰ্টাৰ, শিৱসাগৰ, ৩০ মাৰ্চঃ দ-পৰ্বতীয়া অঞ্চলৰ বাসিন্দা মনজিৎ বৰাই আজি সৰ্প বিশেষজ্ঞ সৌৰভ বৰকটকীক শগুণৰ উপস্থিতি সম্পৰ্কে এক গুৰুত্বপূৰ্ণ বাৰ্তা প্ৰেৰণ কৰে৷ বাৰ্তাটো লাভ কৰাৰ পিছতেই বৰকটকীয়ে ততালিকে উক্ত স্থানত উপস্থিত হৈ আঘাতপ্ৰাপ্ত শগুণটোক উদ্ধাৰ কৰি প্ৰাথমিক চিকিৎসা প্ৰদান কৰে৷ পিছত শগুণটোৰ অৱস্থা সুস্থ হোৱাত বন বিভাগৰ হাতত গতাই দিয়ে৷ উল্লেখ্য যে দীৰ্ঘদিন ধৰি সৌৰভ বৰকটকীয়ে তেজপুৰ অঞ্চলত শগুণৰ অৱস্থা সন্দৰ্ভত অধ্যয়ন চলাই আহিছে আৰু বিভিন্ন ঠাইৰ পৰা তথ্য সংগ্ৰহ কৰি আহিছে৷ তেওঁ জনোৱা অনুসৰি, তেজপুৰত দেখা পোৱা অধিকাংশ শগুণ লাওখোৱা অঞ্চলৰ পৰা আহি এই অঞ্চলত সোমাই পৰে৷ তেজপুৰত শগুণৰ সংখ্যা ক্ৰমে হ্ৰাস পাই অহা বিষয়টোত গভীৰ উদ্বেগ প্ৰকাশ কৰি বৰকটকীয়ে কয় যে, “শগুণসমূহৰ বাসস্থান ধ্বংস, খাদ্যৰ অভাৱ, আৰু পৰিবেশ দূষিত কৰণেই শগুণবোৰ হ্ৰাস হোৱাৰ মূল কাৰণ৷ বিশেষকৈ মৃত জীৱ-জন্তুৰ সংখ্যা হ্ৰাস পোৱাৰ ফলতেই শগুণসমূহে খাদ্য লাভ কৰাত বঞ্চিত হৈছে৷ আন কেতবোৰ কাৰণৰ ভিতৰত – আজিকালি কিছুমান মৃত জীৱ-জন্তুৰ শৰীৰত পোৱা কিছুমান ঔষধৰ উপস্থিতি আৰু তেনে জন্তুৰ মাংস ভক্ষণৰ ফলতো আজিকালি শগুণে মৃত্যুৰ হাৰ বাঢ়ি গৈছে৷ ইয়াৰ উপৰিও মানুহৰ কাৰ্যকলাপ আৰু নগৰীকৰণে শগুণৰ স্বাভাৱিক জীৱনচক্ৰত প্ৰভাৱ পেলাইছে৷ ” তেওঁ আৰু কয় যে, এই সমস্যাটো সমাধানৰ বাবে জনসাধাৰণৰ সচেতনতা বৃদ্ধি কৰা, বনাঞ্চল সংৰক্ষণ কৰা আৰু শগুণৰ বাবে উপযোগী পৰিবেশ সৃষ্টিৰ ওপৰত গুৰুত্ব দিয়াটো অতি প্ৰয়োজনীয়৷ প্ৰকৃতিৰ পৰিষ্কাৰক হিচাপে পৰিচিত শগুণসমূহৰ সংৰক্ষণৰ বাবে সকলো স্তৰৰ লোকে একেলগে আগবাঢ়ি অহাতো বৰ্তমান সময়ৰ দাবী বুলি বিশেষজ্ঞ গৰাকীকে মত প্ৰকাশ কৰে৷
