মৰাণ নগৰ সম্পূৰ্ণৰূপে বন্ধ কৰি মৰাণত ব্যৱসায়ী সন্থাৰ প্ৰতিবাদী সমদল ,শ্ৰম পৰিদৰ্শকৰ কাৰ্যালয় ঘেৰাও
দুৰ্নীতিৰ দৰ্পণ সেৱা, মৰাণ, ২৮ এপ্ৰিলঃ ডিব্ৰুগড় জিলাৰ মৰাণৰ শ্ৰম পৰিদৰ্শক ড° মনচুম কাশ্যপৰ বিৰুদ্ধে ব্যৱস্থা গ্ৰহণৰ দাবীত আজি পুণৰ আন্দোলনৰ কাৰ্যসূচী গ্ৰহণ কৰে মৰাণ আঞ্চলিক ব্যৱসায়ী সন্থাই । আজি পুৱাৰে পৰা মৰাণ নগৰৰ সকলো ব্যৱসায়িক প্ৰতিষ্ঠান বন্ধ ৰাখি ব্যৱসায়ী সকলে নগৰৰ মাজেৰে প্ৰতিবাদী সমদল বাহিৰ কৰে । ইয়াৰ পাছতে মৰাণ নগৰস্থিত শ্ৰম পৰিদৰ্শকৰ কাৰ্যালয় ঘেৰাও কৰি প্ৰতিবাদ সাব্যস্ত কৰে ব্যৱসায়ী সন্থাই । বিতৰ্কিত শ্ৰম পৰিদৰ্শক গৰাকীক অপসাৰণ কৰাৰ লগতে আইনী ব্যৱস্থা গ্ৰহণ কৰাৰ দাবীত ইতিমধ্যে মৰাণ আঞ্চলিক ব্যৱসায়ী সন্থাই ডিব্ৰুগড় জিলাৰ আয়ুক্ত, মৰাণ ৰাজহ চক্ৰৰ চক্ৰ বিষয়াক স্মাৰক পত্ৰ প্ৰদান কৰাৰ উপৰিও ড° মনচুম কাশ্যপৰ বিৰুদ্ধে মৰাণ আৰক্ষী থানাত এজাহাৰ দাখিল কৰিছিল । কিন্তু আজি পৰ্যন্ত আৰক্ষী-প্ৰশাসনে কোনো ব্যৱস্থা গ্ৰহণ নকৰাত ক্ষোভ প্ৰকাশ কৰিছে মৰাণ আঞ্চলিক ব্যৱসায়ী সন্থাই । মৰাণৰ ব্যৱসায়ীসকলক হাৰাশাস্তি কৰাৰ উপৰিও ভয়-ভাবুকিৰে ধন সংগ্ৰহৰ অভিযোগ উত্থাপিত হোৱা শ্ৰম পৰিদৰ্শক ড° মনচুম কাশ্যপৰ ওপৰত শীঘ্ৰেই জিলা প্ৰশাসনে ব্যৱস্থা গ্ৰহণ নকৰিলে অনিৰ্দিষ্ট কাললৈ মৰাণ বন্ধৰ হুংকাৰ দিছে মৰাণ আঞ্চলিক ব্যৱসায়ী সন্থাই ।
