আপিন পাহাৰগাঁৱত কৃত্ৰিম বানত জনদুৰ্ভোগ চূড়ান্তঅবৈধ ফিচাৰীৰ বান্ধ অপসাৰণৰ দাবীত ক্ষোভ প্ৰশাসনৰ আশ্বাসত সাময়িক স্বস্তি

আপিন পাহাৰগাঁৱত কৃত্ৰিম বানত জনদুৰ্ভোগ চূড়ান্ত
অবৈধ ফিচাৰীৰ বান্ধ অপসাৰণৰ দাবীত ক্ষোভ প্ৰশাসনৰ আশ্বাসত সাময়িক স্বস্তি
প্ৰতিনিধি হাইলাকান্দি ২৪ মে: কাটলিচেৰা ৰাজহ চক্ৰৰ অন্তৰ্গত আপিন ২য় খণ্ড পাহাৰগাঁও অঞ্চলত কৃত্ৰিম বানৰ ফলত স্থানীয় বাসিন্দাসকলে চূড়ান্ত দুৰ্ভোগৰ মাজেৰে দিন অতিবাহিত কৰিবলগীয়া হৈছে। বিগত কেইবাদিন ধৰি গাঁৱৰ বিস্তীৰ্ণ এলেকা পানীত ডুবি থকাৰ ফলত স্বাভাৱিক জনজীৱন প্ৰায় স্তব্ধ হৈ পৰিছে। বসতভিটা গ্ৰাম্য পথ আৰু গুৰুত্বপূৰ্ণ যাতায়াতৰ ৰাস্তা পানীৰ তলত যোৱাত শতাধিক পৰিয়ালে নানান সমস্যাৰ সন্মুখীন হ’ব লগা হৈছে।স্থানীয় লোকসকলৰ অভিযোগ অনুসৰি, অঞ্চলটোৰ এটা অবৈধ ফিচাৰীৰ বান্ধে প্ৰাকৃতিক জল নিষ্কাশন ব্যৱস্থাত বাধাৰ সৃষ্টি কৰাত এই জলাবদ্ধতাৰ উদ্ভৱ হৈছে। সামান্য বৰষুণ হ’লেই পানী ওলাই যাব নোৱাৰি বিস্তীৰ্ণ এলেকাত জমা হৈ থাকে আৰু বৰ্তমান সেয়া কৃত্ৰিম বানৰ ৰূপ লৈছে। ফলস্বৰূপে বহু পৰিয়াল ঘৰৰ ভিতৰতে আবদ্ধ হৈ থাকিবলৈ বাধ্য হৈছে।
দীঘলীয়া সময় ধৰি সমস্যাটো অব্যাহত থকাৰ পিছতো কোনো ফলপ্ৰসূ ব্যৱস্থা গ্ৰহণ কৰা হোৱা নাই বুলি অভিযোগ উত্থাপন কৰিছে গাঁওবাসীয়ে। বিগত দুদিন ধৰি অধিকাংশ এলেকা প্লাৱিত হৈ থকাৰ পাছতো আৰম্ভণিতে প্ৰশাসনৰ কোনো দায়িত্বশীল বিষয়া ঘটনাস্থলী পৰিদৰ্শন কৰিবলৈ অহা নাছিল বুলি স্থানীয়সকলে ক্ষোভ প্ৰকাশ কৰে।
পৰিস্থিতিৰ অৱনতি ঘটাত আজি প্ৰশাসনৰ বিভিন্ন বিভাগৰ বিষয়াসকলে ঘটনাস্থলী পৰিদৰ্শন কৰে। কাটলিছড়া ৰাজহ চক্ৰৰ চক্ৰ বিষয়া গৌতম ভাস্কৰ, আৰক্ষী প্ৰশাসনৰ প্ৰতিনিধি আৰু আন আন বিভাগৰ বিষয়াসকলে ক্ষতিগ্ৰস্ত অঞ্চলৰ পৰিস্থিতি পৰ্যবেক্ষণ কৰে। পাছত জিলা পৰিষদৰ সদস্য দিলোৱাৰ হুছেইন বৰভূঞাও ঘটনাস্থলীত উপস্থিত হৈ স্থানীয় লোকসকলৰ সৈতে আলোচনা কৰে।
এই উপলক্ষে স্থানীয় লোকসকলৰ হৈ কৃষক মুক্তিৰ সাধাৰণ সম্পাদক ফৰিদ উদ্দিন লস্কৰ, ছাত্ৰ মুক্তিৰ নেতা খাইৰুল ইছলাম বৰভূঞা, এপি সদস্য বদৰুল ইছলাম বৰভূঞা, সুলাইমান উদ্দিন লস্কৰ, ছাৰিম উদ্দিন লস্কৰ আদি বিশিষ্ট ব্যক্তিয়ে প্ৰশাসনৰ সন্মুখত সমস্যাটোৰ সবিশেষ দাঙি ধৰি অবৈধ ফিচাৰীৰ বান্ধ তৎকালীনভাৱে অপসাৰণৰ জোৰ দাবী জনায়। তেওঁলোকে কয় যে শীঘ্ৰে ব্যৱস্থা গ্ৰহণ নকৰিলে ভৱিষ্যতে বৃহত্তৰ গণআন্দোলনৰ পথ বাচি ল’বলৈ বাধ্য হ’ব অঞ্চলবাসী।আলোচনাৰ অন্তত চক্ৰ বিষয়া গৌতম ভাস্কৰে জানিবলৈ দিয়ে যে বৰ্তমান এলেকাটো পানীত ডুবি থকাৰ বাবে সম্পূৰ্ণ সমীক্ষা চলোৱা সম্ভৱ নহয়। কিন্তু বানপানী নামি যোৱাৰ পাছত কাটলিছড়া আৰু লালা ৰাজহ চক্ৰৰ বিষয়াসকলক লৈ এক যৌথ বিস্তৃত সমীক্ষা চলোৱা হ’ব। তদন্তত যদি প্ৰমাণিত হয় যে ফিচাৰীৰ বান্ধৰ বাবেই জলাবদ্ধতা আৰু কৃত্ৰিম বানৰ সৃষ্টি হৈছে তেন্তে সংশ্লিষ্ট ব্যক্তিসকলৰ বিৰুদ্ধে প্ৰয়োজনীয় প্ৰশাসনিক আৰু আইনগত ব্যৱস্থা গ্ৰহণ কৰা হ’ব।ইয়াৰ উপৰিও বৰ্তমানৰ পৰিস্থিতিত স্থানীয় লোকসকলৰ যাতায়াতৰ সুবিধাৰ বাবে দুটা নাওৰ ব্যৱস্থা কৰাৰ লগতে গৃহপালিত পশুৰ খাদ্য সংকট মোকাবিলাৰ বাবে প্ৰয়োজনীয় সহায় আগবঢ়োৱাৰ আশ্বাস দিয়া হয়।প্ৰশাসনৰ এই ঘোষণাক ইতিবাচক পদক্ষেপ হিচাপে গ্ৰহণ কৰিলেও ইয়াৰ দ্ৰুত বাস্তৱায়নৰ দাবী জনাইছে স্থানীয় বাসিন্দাসকলে। তেওঁলোকৰ মতে আপিন পাহাৰগাঁৱৰ এই কৃত্ৰিম বান কেৱল এটা মৌচুমী সমস্যা নহয় বৰং দীঘলীয়া সময় ধৰি চলি অহা জল নিষ্কাশন ব্যৱস্থাৰ অব্যৱস্থাপনাৰ ফল। সেয়েহে সমস্যাটোৰ স্থায়ী সমাধানৰ বাবে দ্ৰুত আৰু ফলপ্ৰসূ পদক্ষেপ গ্ৰহণ কৰাটো অতি প্ৰয়োজনীয়।স্থানীয় লোকসকলে আশা প্ৰকাশ কৰিছে যে প্ৰশাসনে ঘোষণা কৰা সমীক্ষা আৰু পৰৱৰ্তী ব্যৱস্থাৰ জৰিয়তে এই দীঘলীয়া সমস্যাৰ স্থায়ী সমাধান হ’ব আৰু ভৱিষ্যতে এনে দুৰ্ভোগৰ পৰা অঞ্চলবাসীয়ে মুক্তি লাভ কৰিব।