ডিমৌত নিৰ্বাচনী ৰণডংকাঃসুশান্ত বৰগোঁহাই আৰু অজয় কুমাৰ গগৈৰ মাজত তীব্ৰ শক্তি প্ৰদৰ্শন*
দুৰ্নীতিৰ দৰ্পণ, ষ্টাফ ৰিপৰ্টাৰ, শিৱসাগৰ, ২৩ মাৰ্চঃ নৱগঠিত ডিমৌ বিধানসভা সমষ্টিক কেন্দ্ৰ কৰি বৰ্তমান ৰাজনৈতিক পৰিৱেশ উত্তপ্ত হৈ পৰিছে৷ ২০২৬ চনৰ বিধানসভা নিৰ্বাচনৰ মনোনয়ন পত্ৰ দাখিলৰ অন্তিম দিনটোত শাসকীয় বিজেপি আৰু বিৰোধী কংগ্ৰেছ— দুয়োটা দলেই নিজৰ নিজৰ শক্তি প্ৰদৰ্শনেৰে শিৱসাগৰৰ ৰাজপথ উত্তাল কৰি ৰাখে৷ ডিমৌ সমষ্টিত এইবাৰ মূল যুঁজখন হ’ব বিজেপিৰ প্ৰাৰ্থী তথা অভিজ্ঞ ৰাজনীতিবিদ সুশান্ত বৰগোঁহাই আৰু কংগ্ৰেছৰ নতুন মুখ অজয় কুমাৰ গগৈৰ মাজত৷ মনোনয়ন দাখিলৰ সময়ত দুয়োগৰাকী প্ৰাৰ্থীয়ে দহ সহস্ৰাধিক সমৰ্থকৰ বিশাল সমদল, বাহন আৰু মটৰচাইকেল ৰেলীৰে শিৱসাগৰ জিলা আয়ুক্তৰ কাৰ্যালয়ত উপস্থিত হয়৷ এই শক্তি প্ৰদৰ্শনে ডিমৌৰ আকাশ-বতাহ দুয়োটা দলৰ জয়ধ্বনিৰে মুখৰিত কৰি তোলে৷ বিজেপি প্ৰাৰ্থী সুশান্ত বৰগোঁহাই পূৰ্বৰ থাওৰা সমষ্টিৰ পৰা তিনিবাৰকৈ বিধায়ক হিচাপে নিৰ্বাচিত হৈছিল আৰু এইবাৰ চতুৰ্থবাৰৰ বাবে নিৰ্বাচনী যুঁজত অৱতীৰ্ণ হৈছে৷ মনোনয়ন দাখিলৰ সময়ত তেওঁৰ সৈতে মিত্ৰদল অসম গণ পৰিষদ আৰু গণ শক্তিৰ নেতৃবৃন্দও উপস্থিত থাকে৷ বৰগোঁহাইয়ে অতি আত্মবিশ্বাসেৰে কয় যে চৰকাৰৰ উন্নয়নমূলক কামৰ বাবে ৰাইজে তেওঁক পূৰ্বতকৈ অধিক ভোটৰ ব্যৱধানত জয়ী কৰাব৷ আনহাতে, কংগ্ৰেছৰ প্ৰাৰ্থী অজয় কুমাৰ গগৈয়ে কৰ্মৰত পেছাদাৰী বৃত্তি এৰি সক্ৰীয় ৰাজনীতিত ভৰি দিছে৷ যোৱা উপ-নিৰ্বাচনত তেওঁ প্ৰাৰ্থিত্ব লাভ কৰা নাছিল যদিও ২০২৬ চনৰ নিৰ্বাচনত প্ৰথমবাৰৰ বাবে কংগ্ৰেছৰ পৰা প্ৰাৰ্থিত্ব লাভ কৰি নিজৰ সংসদীয় ৰাজনীতিৰ যাত্ৰা আৰম্ভ কৰিছে৷ মনোনয়ন পত্ৰ দাখিলৰ সময়ত অজয় কুমাৰ গগৈৰ সৈতে অহা বিশাল জনসমুদ্ৰই শক্তিশালী নেতা সুশান্ত বৰগোঁহাইক এক তীব্ৰ প্ৰত্যাহ্বান জনোৱা পৰিলক্ষিত হৈছে৷ গগৈয়ে কয় যে ৰাইজ কোনো আঁচনিৰ লোভত নহয়, বৰঞ্চ পৰিৱৰ্তন আৰু নিজৰ সন্তানৰ সুৰক্ষিত ভৱিষ্যতৰ বাবেহে স্বতঃস্ফূৰ্তভাৱে ওলাই আহিছে৷ এনেদৰে এজন অভিজ্ঞ ৰাজনীতিবিদ আৰু এজন নতুন প্ৰাৰ্থীৰ মাজত হোৱা এই সমানে সমানে যুঁজে ডিমৌৰ ৰাজনৈতিক বতাহ এক প্ৰকাৰ গৰম কৰি তুলিছে৷ মনোনয়ন পত্ৰ দাখিলৰ সময়ত সংবাদ মাধ্যমৰ আগত সুশান্ত বৰগোঁহাইয়ে তেওঁৰ ৰাজনৈতিক জীৱনৰ অভিজ্ঞতাৰ কথা উল্লেখ কৰি কয় যে তেওঁ এতিয়ালৈকে পাঁচবাৰ মনোনয়ন পত্ৰ দাখিল কৰিছে যদিও আজিৰ দৰে অভূতপূৰ্ব জনসমৰ্থন তেওঁ আগতে কেতিয়াও দেখা নাছিল৷ তেওঁৰ মতে এই বিপুল জনসোঁতৰ মূল কাৰণটো হ’ল চৰকাৰখনে ৰাইজৰ প্ৰতি কৰি অহা বিভিন্ন জনহিতকৰ কাম আৰু সমষ্টিটোত হোৱা আশানুৰূপ উন্নয়ন৷ এই উন্নয়নৰ ধাৰাত ৰাইজ যথেষ্ট সন্তুষ্ট হৈছে আৰু সেইবাবেই তেওঁলোকে মিত্ৰজোঁটক আদৰি লৈছে৷ তেওঁৰ সৈতে অসম গণ পৰিষদ আৰু গণ শক্তিৰ দৰে মিত্ৰদলৰ জিলা সভাপতি আৰু কেন্দ্ৰীয় নেতৃবৃন্দও উপস্থিত আছিল আৰু সকলোৱে একগোট হৈ এই মনোনয়ন দাখিল কৰিছে৷ তেওঁ অতি আত্মবিশ্বাসেৰে কয় যে এইবাৰ মিত্ৰজোঁটে বহুত ভোটৰ ব্যৱধানত জয়লাভ কৰিব আৰু এই ক্ষেত্ৰত তেওঁ এশ শতাংশই নিশ্চিত৷ নিৰ্বাচনৰ প্ৰতিদ্বন্দ্ব্বিতাৰ সন্দৰ্ভত তেওঁ কয় যে লোকতন্ত্ৰত বিৰোধী দল থাকিবই আৰু এইবাৰ তেওঁৰ বিৰুদ্ধে কংগ্ৰেছ আৰু ভাৰতীয় জাতীয় পৰিষদে যুঁজ দিছে৷ তেওঁ বিৰোধী প্ৰাৰ্থীগৰাকীক শুভকামনা জনোৱাৰ লগতে কয় যে ৰাজনৈতিক প্ৰতিদ্বন্দ্ব্বিতা নিৰ্বাচনৰ দিনটোলৈকেহে থাকিব, তাৰ পিছত সকলো আকৌ ব্যক্তিগত আৰু সামাজিকভাৱে আগৰ দৰে এক হৈ পৰিব৷ যোৱাবাৰ তেওঁ ৩৩ হাজাৰ ভোটত জয়ী হৈছিল যদিও এইবাৰ সেই ব্যৱধান ১০ ৰ পৰা ১৫ হাজাৰ অধিক হ’ব বুলি তেওঁ দৃঢ়তাৰে প্ৰকাশ কৰে৷ আনহাতে অজয় কুমাৰ গগৈয়ে তেওঁৰ মনোনয়ন দাখিলৰ সময়ত কয় যে তেওঁ ভাৰতীয় জাতীয় কংগ্ৰেছৰ তৰফৰ পৰা আৰু আন কেইবাটাও মিত্ৰদলৰ সমৰ্থনত আজি এই মনোনয়ন পত্ৰ দাখিল কৰিছে৷ এই দিনটোত তেওঁ অতি আনন্দিত অনুভৱ কৰিছে আৰু তেওঁৰ সৈতে ৰাইজৰ দল তথা অসম জাতীয় পৰিষদৰ কেন্দ্ৰীয় নেতৃত্বও উপস্থিত আছে৷ তেওঁ কয় যে ৰাইজৰ যি স্বতঃস্ফূৰ্ত সঁহাৰি দেখা গৈছে, সেই সঁহাৰিয়ে তেওঁলোকক এক বিশেষ বিশ্বাস আৰু আস্থা প্ৰদান কৰিছে যে এই নিৰ্বাচনত তেওঁলোকৰ জয় নিশ্চিত৷ তেওঁৰ মতে তেওঁৰ সৈতে অহা এই বিশাল মানুহখিনিক কোনো চৰকাৰী আঁচনিৰ আশাত বা ভয়-ভাবুকি দি মাতি অনা হোৱা নাই৷ এই মানুহখিনি কেৱল পৰিত্ৰাণ আৰু পৰিবৰ্তনৰ স্বাৰ্থত নিজৰ সন্তানৰ সুৰক্ষিত ভৱিষ্যতৰ বাবে ওলাই আহিছে৷ তেওঁৰ বিশ্বাস যে যদিহে বিজেপি চৰকাৰক শাসনৰ পৰা আঁতৰাই ৰাখিব নোৱাৰি, তেন্তে ভৱিষ্যত প্ৰজন্মই এক অনিশ্চিত জীৱন অতিবাহিত কৰিব লগা হ’ব৷ গতিকে অসমৰ ঐতিহ্য ৰক্ষাৰ বাবে আৰু এক নতুন অসম গঢ়াৰ স্বাৰ্থত গৌৰৱ গগৈৰ নেতৃত্বত তেওঁলোকে আগবাঢ়ি গৈছে৷ তেওঁ চৰকাৰী পক্ষৰ প্ৰত্যাহ্বানৰ কথা স্বীকাৰ কৰি কয় যে যেতিয়া ৰাইজে এবাৰ মন বান্ধি লয় আৰু চৰকাৰ পৰিবৰ্তনৰ সিদ্ধান্ত লয়, তেতিয়া কোনো প্ৰত্যাহ্বানই বাধা হৈ থিয় দিব নোৱাৰে৷ এই হাজাৰ হাজাৰ মানুহৰ উপস্থিতিয়ে ইতিমধ্যে প্ৰমাণ কৰিছে যে এইবাৰ পৰিবৰ্তন হ’বই আৰু কংগ্ৰেছ মিত্ৰজোঁটৰ এখন শক্তিশালী চৰকাৰ প্ৰতিষ্ঠা হ’ব৷
