বিপিএফৰ গুমা ব্লক কাৰ্যালয়ত নৱনিৰ্বাচিত বিধায়ক ৰুপম চন্দ্ৰ ৰায়ক সম্বৰ্ধনা
দুৰ্নীতিৰ দৰ্পণ, ষ্টাফ ৰিপ’ৰ্টাৰ নুৰছালাম আলী, ৭ মে: বাওখুংগ্ৰী সমষ্টিৰ নৱনিৰ্বাচিত বিধায়ক ৰুপম চন্দ্ৰ ৰায়ক আজি বিপিএফৰ গুমা ব্লক কাৰ্যালয়ত দলীয় কৰ্মী আৰু সমৰ্থকসকলে উষ্ম সম্বৰ্ধনা জ্ঞাপন কৰে৷ এই উপলক্ষে আয়োজন কৰা এক অনুষ্ঠানত বিপিএফৰ ২ নং গুমা সমষ্টিৰ এমচিএলএ এন্তাজ আলী লগতে বিপিএফৰ জ্যেষ্ঠ নেতা-কৰ্মী, স্থানীয় গণ্যমান্য ব্যক্তি তথা বহু সংখ্যক সমৰ্থক উপস্থিত থাকে৷ অনুষ্ঠানত বক্তব্য ৰাখি বিধায়ক ৰুপম চন্দ্ৰ ৰায়ে দলীয় কৰ্মীসকলৰ অক্লান্ত পৰিশ্ৰম আৰু জনসাধাৰণৰ আস্থাৰ বাবে কৃতজ্ঞতা প্ৰকাশ কৰে৷ তেওঁ সমষ্টিৰ সামগ্ৰিক উন্নয়ন, শিক্ষা, স্বাস্থ্য আৰু যাতায়াত ব্যৱস্থাৰ ক্ষেত্ৰত অধিক গুৰুত্ব আৰোপ কৰি কাম কৰাৰ প্ৰতিশ্ৰুতি দিয়ে৷ ইফালে উপস্থিত দলীয় নেতাসকলে নতুন বিধায়কৰ নেতৃত্বত বাওখুংগ্ৰী সমষ্টিত উন্নয়নৰ নতুন দিশ উন্মোচিত হ’ব বুলি আশা প্ৰকাশ কৰে৷ অনুষ্ঠানটোত সাংস্কৃতিক পৰিৱেশনৰ লগতে ফুলাম গামোচা আৰু স্মাৰক প্ৰদানৰ জৰিয়তে বিধায়কগৰাকীক সম্বৰ্ধনা জনোৱা হয়৷
