হাউলীত অনুষ্ঠিত হ’ব সদৌ অসম ছাত্ৰ সন্থাৰ কেন্দ্ৰীয় বিষ্ণু ৰাভা দিৱস
••••••••••••••••••••••••••••••••••••••••
দুৰ্নীতিৰ দৰ্পণ, কংকণ তালুকদাৰ, হাউলী, ১০ মে :
সদৌ বৰপেটা জিলা ছাত্ৰ সন্থাৰ উদ্যোগত হাউলী আঞ্চলিক ছাত্ৰ সন্থা আৰু হাউলীবাসী ৰাইজৰ সহযোগত সদৌ অসম ছাত্ৰ সন্থাৰ কেন্দ্ৰীয় বিষ্ণুৰাভা দিৱসৰ অভ্যৰ্থনা সমিতি গঠনৰ বাবে এখন ৰাজহুৱা সভা অনুষ্ঠিত হয় । হাউলী চণ্ডীবৰুৱা স্মৃতি ভৱনত আজি ১০ মে’ত ১১ বজাত অনুষ্ঠিত হোৱা সভাখনত সভাপতিত্ব কৰে অৰ্ণৱ জ্যোতি শৰ্মাই । সভাত উপস্থিত থাকে মুখ্য সাংগঠনিক সম্পাদক নয়নজ্যোতি দাসৰ লগতে কেন্দ্ৰীয় নেতৃবৃন্দ । ড° ভগীৰথ নাথক সভাপতি হিচাপে লৈ গঠন কৰা অভ্যৰ্থনা সমিতিত ভবানন্দ দাস(পাঠক) আৰু দেৱাদ্বীপ দাসক কাৰ্যকৰী সভাপতি, নয়নজ্যোতি দাসক সাধাৰণ সম্পাদক, ডা° মাধুৰ্য পৰাণ দাস আৰু উৎপল ৰায়ক সম্পাদক হিচাপে ৰাইজৰ ফালৰপৰা মনোনীত কৰা হয় । উল্লেখ্য যে সদৌ অসম ছাত্ৰ সন্থাৰ কেন্দ্ৰীয় বিষ্ণুৰাভা দিৱস ১৯ আৰু ২০ জুন তাৰিখে হাউলী অনুষ্ঠিত কৰা হ’ব । দুদিনীয়াকৈ হ’ব লগা কাৰ্যসূচীত বিভিন্ন ধৰণৰ প্ৰতিযোগিতা, সাধাৰণ সভা, সাংস্কৃতিক অনুষ্ঠান থাকিব বুলি উদ্যোক্তাসকলে জানিবলৈ দিছে । আয়োজক বৰপেটা জিলা ছাত্ৰ সন্থাই কাৰ্যসূচীসমূহৰ সফল ৰূপায়ণৰ বাবে হাউলীৰ লগতে সমগ্ৰ বৰপেটা জিলাৰ ৰাইজৰ সহায় সহযোগিতা কামনা কৰিছে । হাউলীৰ বিশিষ্ট ব্যক্তি লক্ষ্মীকান্ত দাস, চম্পক কুমাৰ নাথ, ডুলুমণি দাস, নিতুমণি দাস আদিয়ে নিজৰ নিজৰ চমু ভাষণত আগন্তুক অনুষ্ঠানটোৰ বাবে বিভিন্ন ধৰণৰ দিহা পৰামৰ্শ আগবঢ়ায় ।
