ধিং সমষ্টিত বিশাল ৰেলি উলিয়াই মনোনয়ন দাখিল ৰাইজৰ দলৰ প্ৰাৰ্থী মেহবুব মুক্তাৰৰ
ইছফাকুৰ ৰহমান, দুৰ্নীতিৰ দৰ্পণ, মৈৰাবাৰী, ২৩ মাৰ্চ: আগন্তুক বিধানসভা নিৰ্বাচনক কেন্দ্ৰ কৰি ৰাজনৈতিক পৰিৱেশ দিনক দিনে গৰম হৈ উঠাৰ মাজতেই আজি ধিং সমষ্টিৰ ৰাইজৰ দলৰ প্ৰাৰ্থী মেহবুব মুক্তাৰে আনুষ্ঠানিকভাৱে নিজৰ মনোনয়ন পত্ৰ দাখিল কৰে৷ মনোনয়ন দাখিল কৰাৰ অন্তিম দিনা নগাঁও জিলা আয়ুক্ত কাৰ্যালয়ত অনুষ্ঠিত এই মনোনয়ন দাখিল কাৰ্যসূচীত নেতা জনৰ লগত দলীয় কৰ্মী-সমৰ্থকৰ ব্যাপক উপস্থিতি লক্ষ্য কৰা যায়৷ পুৱা ভাগতেই মৈৰাবাৰীত অৱস্থিত নিজৰ বাসগৃহৰ সন্মুখৰ পৰা এক বিশাল ৰেলিৰ আয়োজন কৰি সমৰ্থকসকলৰ সৈতে নগাঁও অভিমুখে ৰাওনা হয় প্ৰাৰ্থীজন৷ ৰেলিটোত সহস্ৰাধিক কৰ্মী-সমৰ্থকে অংশগ্ৰহণ কৰি দলীয় পতাকা আৰু শ্লোগানেৰে পৰিৱেশ উত্তাল কৰি তোলে৷ মনোনয়ন দাখিলৰ পিছত সংবাদ মাধ্যমৰ সৈতে হোৱা আলাপত মেহবুব মুক্তাৰে কয় যে, “এইবাৰ ধিং সমষ্টিৰ ৰাইজে উন্নয়ন বিচাৰে৷ বহুদিন ধৰি চলি অহা ধৰ্মীয় ৰাজনীতিৰ পৰা ৰাইজে মুক্তি বিচাৰে৷ সেয়ে এইবাৰ ভোটাৰসকলে সঠিক সিদ্ধান্ত লৈ পৰিৱৰ্তন আনিব৷ ” তেওঁ আৰু কয় যে, ধিং সমষ্টিত এইবাৰ এআইইউডিএফ (AIUDF)ক ভোটাৰ ৰাইজে প্ৰত্যাখ্যান কৰিব আৰু বিৰোধী ঐক্য মঞ্চৰ প্ৰাৰ্থীৰ জয় নিশ্চিত৷ “আমাৰ প্ৰথম কথাও উন্নয়ন, শেষ কথাও উন্নয়ন, ” বুলি মন্তব্য কৰি তেওঁ ৰাইজৰ দলৰ জয় এইবাৰ নিশ্চিত বুলি আত্মবিশ্বাস ব্যক্ত কৰে৷ উল্লেখযোগ্য যে, ধিং সমষ্টিত এইবাৰ কংগ্ৰেছ দলৰ লগত মিত্ৰতা হোৱাত ৰাইজৰ দলৰ জয়ী হোৱাৰ আশা অধিক৷ তেনে পৰিস্থিতিত ৰাইজৰ দলৰ প্ৰাৰ্থী মেহবুব মুক্তাৰৰ এই মনোনয়ন দাখিল কাৰ্যসূচীয়ে সমষ্টিটোৰ ৰাজনৈতিক সমীকৰণত নতুন গতি আনিব বুলি ৰাজনৈতিক মত ব্যক্ত কৰিছে৷
