মৰিগাঁও জিলাৰ পেট্ৰ’ল পাম্পসমূহৰ স্বত্বাধিকাৰী আৰু প্ৰবন্ধকসকলৰ সৈতে জিলা প্ৰশাসনৰ বৈঠক, অবৈধ মজুতকৰণ আৰু ক’লা বজাৰ সন্দৰ্ভত সকিয়াই দিলে জিলা আয়ুক্তই
ইছফাকুৰ ৰহমান, দুৰ্নীতিৰ দৰ্পণ, মৈৰাবাৰী, ২৭ মাৰ্চ: মৰিগাঁও জিলাৰ পেট্ৰ’ল পাম্পসমূহত পেট্ৰ’লৰ কৃত্ৰিম নাটনি সন্দৰ্ভত আজি জিলা আয়ুক্তৰ কাৰ্যালয়ৰ সভাকক্ষত এখন গুৰুত্বপূৰ্ণ বৈঠক অনুষ্ঠিত হয়৷ জিলা আয়ুক্ত অনামিকা তেৱাৰীৰ সভাপতিত্বত অনুষ্ঠিত বৈঠকত পেট্ৰ’ল পাম্পৰ স্বত্বাধিকাৰী আৰু প্ৰবন্ধকসকলক কেতবোৰ নিৰ্দেশনা প্ৰদান কৰা হয়৷ সেই অনুসৰি পেট্ৰ’ল পাম্পসমূহত ক্ষমতা অনুসৰি সম্পূৰ্ণ ইন্ধন মজুত ৰাখিবলৈ নিৰ্দেশ দিয়া হয়৷ সভাত যিকোনো পাত্ৰ, বটল বা ড্ৰামত পেট্ৰ’ল দিয়াৰ পৰা বিৰত থাকিবলৈ পেট্ৰ’ল পাম্পসমূহক নিৰ্দেশ দিয়া হয়৷ লগতে জিলা আয়ুক্তগৰাকীয়ে পেট্ৰ’ল পাম্পসমূহত পেট্ৰ’ল বা ডিজেল মজুত থকা সন্দৰ্ভত বোৰ্ডত লিখি জনসাধাৰণে দেখাকৈ প্ৰদৰ্শন কৰিবলৈ নিৰ্দেশ দিয়ে৷ জিলা আয়ুক্তগৰাকীয়ে অবৈধ মজুতকৰণ আৰু ক’লা বজাৰ সন্দৰ্ভত সকিয়াই দি কয় যে এনে কাৰ্য কোনো কাৰণতে সহ্য কৰা নহ’ব৷
